Fiann Paul
Fiann Paul
Ljósmyndarinn Fiann Paul er án efa þekktastur á Íslandi fyrir portrettmyndir sínar af börnum sem voru á horni Lækjargötu og Austurstrætis. Í bók hans Goðsögninni sameinast ævintýralega fallegar ljósmyndir úr íslensku landslagi og þroskasaga sem vísar ekki bara inn á við heldur líka aftur í norræna goðafræði. Fiann hefur farið víða um heim og dvalið langdvölum í Himalajafjöllunum, Nepal og Grænlandi, svo eitthvað sé nefnt. Sérstöku ástfóstri hefur hann þó tekið við Ísland og býr ýmist hér eða í Los Angeles.
Í Goðsögninni, sem er fyrsta bók höfundar, sameinast ljósmyndir hans og saga þar sem hann fjallar um persónulegan þroska í bland við reynslu sína og hughrif frá því hann bjó og starfaði í Himalajafjöllum. Goðsögnin er í þýðingu Þorgríms Þráinssonar en kemur einnig út á ensku undir nafninu Legend. Myndirnar í bókinni minna á málverk, og sviðsetning og búningar kalla fram einstaka stemmningu sem lætur engan ósnortinn. Myndirnar voru teknar úti í náttúrunni og engin stúdíóvinna átti sér stað. Bakgrunnurinn er raunverulegur í öllum tilfellum.
